fbpx

واش عمرك فكرتي فأنترنيت حلال ؟

واحد الشركة ناشئة (startup) ماليزية  فاجأت العالم هاد الأيام بفكرة  جديدة ومميزة : تصميم وتحسين أول متصفح على مستوى العالم معتمد من قبل الشريعة الإسلامية، مع أخذ في عين الإعتبار حياة المسلمين، واللي سماتو “سلام ويب”SalamWeb .

بالنسبة للشركة العالم دابا فيه ما يقارب 1.8 مليار مسلم وبزاف منهم كيحلموا بتصفح الويب بطريقة سليمة هادشي علاش غادي توفر ليهم مجموعة من les filtres  لتصفية المحتوى غير المناسب ليهم، خاصة فهاد الوقت اللي كلشي متخوف بشأن الخصوصية ،الأخبار والمعاملات المزيفة على الإنترنت.

كيعتمد “سلام ويب” على تعاون مستخدمي  التطبيق، بحيث أنهم كيقدروا ينتقيو المحتوى ويحددوا صفحات الويب على أنها ملائمة أو غير ملائمة، وبالتالي كتحذر المستخدمين ملي  كيقربوا من المواقع اللي فيها المقامرة أو المواقع الإباحية، أيضا التطبيق كيوفر خدمات خاصة بالمسلمين، مثل محادثات ، أخبار،أوقات الصلاة ، اتجاه القبلة

الشركة كتراهن على أن هاد المنتوج غادي يحظى باهتمام إسلامي و عربي واخا كتوقع أن أغلبية المستخدمين غاديين يكونوا من ماليزيا وإندونيسيا بشكل رئيسي ، “سلام ويب” عندها طموح للعالمية بحيث صرحت أنه واخا الموقع يستهدف المسلمين، يمكن  يستخدمو أي شخص غير مسلم كبديل فهاد العالم الرقمي خصوصا مع المميزات الي كيقدمها.

بالرغم من أن هيئة الرقابة الشرعية المستقلة “أماني” صادقات على هاد  المتصفح، واللي كيمنع قانونها الأساسي الأنشطة اللي تعتبر غير أخلاقية، مثل المقامرة، المنتجات المالية الربوية والأعمال المتعلقة بالكحول و لحم الخنزير.

بزاف د الناس كيتساءلوا حول احتمالية نجاح هاد المشروع فالعالم العربي وحتى خارج العالم الإسلامي من ناحية مصداقيتو ووعود الخصوصية لي كيقدم خصوصا أنه غادي يكون فمنافسة المتصفحات الأخرى، مثل “غوغل كروم “.

Salwa Taleb

Salwa Taleb, étudiante en marketing, humoriste d'âme et rédactrice passionnée. Je suis Super fan de la culture japonaise et du monde 2.0, parce que le futur du digital au Maroc est notre responsabilité tous.