fbpx

كيفاش كيخدم التورنت ؟

ضروري ما تكونو استعملتو التورنت شي نهار ملي جيتو تيليشارجيو شي فيلم أو لعبة .. ولكن واش تساءلتو كيفاش كيخدم هاد التورنت ؟

شنو هو التورنت ؟

أولاً التورنت هو عبارة عن طريقة من طرق التحميل اللي كتعتمد على بروتوكول ” الند للند ” Peer-to-Peer P2P. هاد البروتكول كيسمح لينا نتواصلو بحاسوب آخر عن بعد بدون أي وسيط ، يعني نقدر نتواصل مع البيسي ديال شي واحد ففرنسا مباشرة بدون استعمال طرف ثالث.

كيفاش كيخدم التورنت ؟

هادا كيعني أننا ملي كنتليشارجيو شي فيلم مثلاً بالتورنت، فحنايا كنتلشارجيوه من البيسي ديال واحد الشخص آخر أو مجموعة من الأشخاص وماشي من السيرفر (على عكس طريقة التحميل العادية اللي كنستعملو فيها مثلاً برنامج Internet Download Manager واللي عن طريقها كنتليشارجيو من السيرفر).

دابا مثلاً إلا بغينا لعبة GTA V ، كنتليشارجيو واحد الملف صغير ديال التورنت (كينتهي بـ .torrent) وكنفتحوه فشي برنامج ديال التورنت ( مثلاً uTorrent إو BitTorrent). داك الملف الدور ديالو هو يلاقينا مع دوك الناس اللي عندهوم اللعبة فالبيسي ديالهوم ، يعني كيقوم بتتبع الأجهزة اللي فيها اللعبة وكيربط الاتصال معاها، داكشي علاش سميتو Tracker (أشهر موقع ديال التراكينغ هو The Pirate Bay).

الناس اللي غنتليشارجيو من عندهوم اللعبة

هادوك كيتسماو Seeders ، وفيهم جوج أنواع :

1- هادوك اللي ديجا عندهوم اللعبة كاملة فالبيسي ، يعني تليشارجاوها شحال هادي.
2- هادوك اللي باقي حتى هوما كيتليشاجيو اللعبة.

مثال: عندنا واحد الشخصA كيتليشارجي لعبة GTA V ووصلات لـ %40 وعندنا شخص آخرB حتا هو كيتليشارجي نفس اللعبة ووصلات لـ %60. دابا ملي غانجيو نتليشارجيو اللعبة من عند هاد الجوج ، غنتليشارجيو من عند الشخص A داك %40 اللي وصلها هو ، زائد غنتليشارجيو من عند الشخص B داك %60 اللي وصلها هو، وبالتالي غنكونو تليشارجينا %100 من اللعبة.

أو كاين Leechers دوك الناس اللي كيستعملو التورنت وكيتليشارجيو منو ولكن مكيخليوش ناس أخرين يتليشارجيو من عندهوم. وبالتالي فهم عكس Seeders اللي كيستعلمو التورنت وفنفس الوقت كيخليو ناس آخرين يتليشارجيو من عندهوم.

بعض نقاط الاختلاف بين التورنت والتحميل العادي

السرعة

سرعة التورنت كتزاد كلما كان العدد ديال Seeders كتير، بمعنى كلما كانو الناس اللي عندهوم داكشي اللي بغينا نتليشارجيو بزاف كلما تزادت سرعة التحميل ومكيكونش عندها حد أقصى.
على عكس التحميل المباشر من السيرفر، كلما ازداد الضغط على السيرفر كلما نقصات سرعة التحميل ، إضافةً كاين بعض السيرفرات اللي مكيخليوكش تفوت واحد السرعة معينة فالتحميل.

استكمال التحميل

فالتورنت تقدر توقف التحميل وتكملو فوقاش ما بغيتي ، على عكس التحميل من السيرفر اللي كيكون محدود بواحد المدة زمنية اللي مخسكش تفوتها (24 ساعة مثلاً).

Une simple personne qui aime parcourir le monde binaire.